Нуруу бөгтийх
Нуруу дугуйрч хүзүү, толгой урагш болохыг нуруу бөгтийх гэнэ.
Хэдийгээр бөгтийж суух нь хэвийн үзэгдэл ч хүнд хэлбэрийн нуруу бөгтийх нь настай эмэгтэйчүүдэд илүү ажиглагддаг.
Насны онцлогоос шалтгаалсан бөгтөр нь ясны сийрэгжилтийн нөлөөгөөр сээр нурууны хэлбэр өөрчлөгдөн , холбоос дарагдсанаас үүддэг. Бусад төрлийн бөгтөр нь өсвөр насны хүүхдүүдэд элбэг ажиглагддаг ба сээр нуруу бэхжих явцад удаан хугацаагаар бөгтийж суух, байнга бөгтийх зэрэг шалтгаанаар үүснэ.
Хүнд хэлбэрийн бөгтийлт нь ясны хэлбэрийг өөрчлөх аюултай.
Шалтгаан
Хэвийн сээр нурууны яс нь олон цилиндр хэлбэртэй ясыг давхарлаад тавьсан мэт харагддаг. Харин нуруу бөгтийх өвчний үед сээр нурууны дээд хэсэгт нь шаантаг хэлбэртэй болсон байна. Энэ өөрчлөлт нь дараах шалтгаануудын улмаас үүссэн байж болох юм:
- Ясны сийрэгжилт
- Нурууны яс суулт өгөх (Диск суух)
- Төрөлхийн гажиг
- Байнга бөгтийж суух, бөгтийж явах
- Өсвөр насны охид хөхнөөсөө ичиж байнгын бөгтийж явах
- Хорт хавдар болон хорт хавдрын эмчилгээ хийлгэснээс нуруу бөгтөр болсон байж болно.
Шинж тэмдэг
Нуруу бөгтийх өвчнөөс дараах хүндрэлүүд үүсэх магадлалтай.
- Биеийн гоо зүй алдагдах
- Нуруу байнга өвддөг болох
- Хоолны дуршил муудах – Нуруу бөгтөр болсноор хэвлий хэсэг дарагдаж, цатгалан мэт сэтгэгдэл төрнө.
Зөвлөгөө
- Өсвөр насны болон бага насны хүүхдүүдийг бөгтийж суулгахгүй байх
- Өсвөр насны охидтой дотно ярилцаж байх
- Шаардлагатай бол нурууны бөгтөр засах бүс зүүх
- Дасгал хөдөлгөөн тогтмол хийх зэрэг арга хэмжээг авна.
- Өдөр бүр хананд 10 минутын турш гараа алдалж зогсох
- Хүнсэндээ сүү, тараг, бяслаг зэргийг хэрэглэх
Оношилгоо
Эмч үзлэг хийхдээ нуруугаа тэнийлгэж болж байгаа эсэхийг асууна. Мөн дараах зургуудыг авахуулахыг зөвлөнө.
- Рентген зураг
- Компьютер томографи
- MRI зураг
Эмчилгээ
Шинж тэмдэг хэр хүндэрсэн байдлаас шалтгаалан өөр өөр эмчилгээ хийдэг. Өвчин намдаах зорилгоор ибопруфен, ацетаминофен, тиленол зэрэг эм, үрэвслийн эсрэг эмийг эмчийн заавраар уух бөгөөд физик эмчилгээ хийгдэнэ.
Хэрэв нурууны бөгтийлт хүнд хэлбэртэй бол бөгтийх градусыг багасгах мэс засал хийдэг. Сээр нуруунд төмөр хийж нурууны бөгтрийг багасгах мэс засал нь хамгийн элбэг хийгдэнэ.
