Трихомониаз
Трихомониаз нь бактерийн гаралтай бэлгийн замын халдварт өвчин юм. Эмэгтэйчүүдийн хувьд эвгүй үнэртэй зүйл үтрээнээс гарах, загатнах, бие засахад өвдөх зэрэг шинж тэмдэг илэрдэг. Харин эрчүүдийн хувьд шинж тэмдэг илрэхгүй байх тохиолдол элбэг байдаг. Трихомониазаар өвчилсөн жирэмсэн эмэгтэй нь дутуу төрөх магадлалтай.
Шалтгаан
- Олон бэлгийн хавьтагчтай байх
- БЗХӨ тусч байсан байх
- Трихомониаз тусч байсан
- Бэлгийн хавьталд орохдоо хамгаалалт хэрэглээгүй байх
Шинж тэмдэг
Трихомониазын халдвар авсан тохиолдолд онцлох шинж тэмдэг илрэхгүй байж болно.
Хэрэв илэрвэл эмэгтэйчүүдийн хувьд:
- Цагаан, саарал, шар эсвэл ногоон өнгийн эвгүй үнэртэй зүйл үтрээнээс гарах
- Бэлэг эрхтэн улайж, халуу оргиж, загатнах
- Бие засах болон бэлгийн хавьталд ороход өвдөлт мэдрэгдэх
Эрчүүдийн хувьд:
- Бэлэг эрхтний дотор талаар загатнах
- Дур тавьсны дараа халуу оргих, өвдөх
- Бие зассаны дараа халуу оргих, өвдөх
- Бэлэг эрхтнээс шингэн зүйл гарах зэрэг шинж тэмдэг илэрнэ.
Хүндрэл
Трихомониазтай жирэмсэн эмэгтэй:
- Дутуу төрөх
- Ургийн жин бага байх
- Урагт халдварлах зэрэг хүндрэлүүд үүсэх аюултай.
Мөн ХДХВ болон бусад БЗХӨ тусах магадлал нэмэгддэг.
Урьдчилан сэргийлэлт
Бусад БЗХӨ-тэй адилаар хамгаалалтгүй бэлгийн хавьталд орохгүй байх, нэг бэлгийн хавьтагчтай байх арга хэмжээг аваарай.
Оношилгоо
Бэлэг эрхтнээс ялгарсан шингэний дээжийг микроскопиор үзэж трихомониазыг оношилдог.
Эмчилгээ
Трихомониазыг ихэвчлэн эмчийн заавраар нэг тун эм ууж эмчилдэг. Халдвар бүрэн устаж дуусах хүртэл нэг долоо хоногийн хугацаанд бэлгийн хавьталд орохгүй байх, алкоголь уухгүй байхыг анхаарах хэрэгтэй. Эмийн гаж нөлөөгөөр дотор муухайрч, бөөлжих шинж тэмдэг ажиглагдаж болно.
