Мэдрэлийн ёзоорын дарагдал
Мэдрэлийн ёзоорын дарагдал гэж юу вэ?
Мэдрэлийн эргэн тойрны эдүүдэд хэт ачаалал үүсэн дарагдахад мэдрэлийн ёзоорын дарагдал үүсдэг. Энэ даралт нь мэдрэлийн үйл ажиллагааг саатуулан өвдөлт мэдрэгдэх, бадайрах, хүчгүй болох гэх зэргийн шинж тэмдэг ажиглагдана.
Биеийн хэд хэдэн хэсгүүдэд мэдрэлийн ёзоорын дарагдал үүсч болох бөгөөд сээр нурууны доод хэсэг, бугуйн хэсэг зэргээр элбэг тохиолддог.
Сээр нурууны доод хэсгийн мэдрэл дарагдсан бол хөлийн хойд хэсэгт өвдөлт мэдрэгдэнэ. Харин бугуйн мэдрэл дарагдсан бол гарын алга, хуруугаар өвдөлт мэдрэгдэн бадайрах нь ажиглагддаг.
Зөв эмчилгээ хийснээр хэд хоног эсвэл хэдэн долоо хоногийн дотор эмчлэгдэх боломжтой бөгөөд зарим тохиолдолд хагалгааны аргаар эмчилнэ.
Шалтгаан
Дараах шалтгааны улмаар мэдрэл дарагдсан байж болно. Үүнд:
- Гэмтэл авах
- Эвгүй байрлалтай унтсан бол
- Хэрх өвчтэй бол
- Ажлын стресс
- Спортоор хичээллэх
- Хэт таргалалт, илүүдэл жин
- Хэт хүнд зүйл өргөх
Мэдрэлийн ёзоор дарагдсанаас мэдрэл үрэвсэж гэмтэл үүсгэж болно. Дарагдсан мэдрэлийг эмчилсний дараа өвдөлт болон бусад гэмтлүүд эдгэрдэг. Гэвч олон удаа мэдрэл дарагдах, удаан хугацаанд эмчлэхгүй явах нь аюултай нөхцөл үүсгэнэ.
Дараах нөхцөлүүд нь энэ өвчнөөр өвчлөх магадлалыг нэмэгдүүлдэг.
- Эвгүй байрлалтай унтах
- Эвгүй байрлалтай бэлгийн хавьталд орох
- Тулай
- Хэрх өвчин
- Бамбайн өвчин
- Чихрийн шижин
- Хэт таргалалт
- Огцом хөдөлгөөн хийх
- Хүнд зүйл өргөх
- Буруу сууж босох
- Жирэмслэлт
- Удамшлын хүчин зүйл зэрэг орно.
Шинж тэмдэг
- Дарагдсан хэсэгт бадайран, мэдээ алдах
- Дотроос гадагшаа хүчтэй өвдөх
- Зүгээр хатгаж байгаа мэт болох
- Дарагдсан хэсгийн булчин хүчгүй болох, сулрах
- Хөл, гарын үзүүрийн шөрмөс татах
Шөнө унтаж байхад эдгээр шинж тэмдгүүд илүү ажиглагдаж болно.
Хэзээ эмчид хандах вэ?
Сүүлийн хэд хоногт эдгээр шинж тэмдгүүд илэрсэн бөгөөд өөрийн зүгээс өвчин намдаагч хэрэглэсэн ч өвдөлт намдахгүй бол эмчид хандаарай.
Урьдчилан сэргийлэлт
Дараах арга хэмжээ нь мэдрэлийн ёзоор дарагдахаас урьдчилан сэргийлэх арга хэмжээ болно.
- Эвтэйхэн байрлалтай хэвтэж байх, унтах байх
- Дасгал хөдөлгөөн тогтмол хийж байх
- Спортоор хичээллэхдээ анхаарал, болгоомжтой байх
- Хүнд зүйл өргөхгүй байх зэрэг нь тусална.
Оношилгоо
Эмчийн үзлэгт орж, mri, рентген зураг авахуулах, мэдрэлийн шинжилгээ (арьсан доогуур зүү оруулж шинжилгээ авах)зэрэг үзлэгийн тусламжтайгаар мэдрэлийн дарагдлыг оношилдог.
Эмчилгээ
Ихэнх тохиолдолд мэдрэл дарагдсан хэсгийг хөдөлгөхгүй байж физик эмчилгээ, эмэн эмчилгээ хийдэг. Физик эмчилгээ нь мэргэжлийн сувилагчийн зааварчилгаагаар дасгал хийх, иллэг хийлгэх байдлаар хийгддэг бол эмэн эмчилгээ нь өвчин намдаах, үрэвсэл дарах үйлчилгээтэй байна.
Харин хэдэн долоо хоногийн дараа эсвэл хэдэн сарын дараа биеийн байдал сайжрахгүй бол хагалгааны аргаар дарагдсан хэсгийг хэвийн болгодог.
