Насанд хүрсэн хүн тайван байх үед зүрхний цохилтын давтамж минутад дунджаар 60-80 цохилдог. Харин энэхүү үзүүлэлт алдагдаж хэвийн бус цохилохыг зүрхний хэм алдагдал гэнэ. Зүрхний хэм алдагдал нь зүрхний хэмнэлийг зохицуулах цахилгаан дамжуулах механизм алдагдсанаар үүсдэг.

Зүрх нь зарим тохиолдолд хэт удаан эсвэл хэт хурдан цохилж болно. Жишээлбэл дасгал хийх үед нэмэгдэж, унах үед удааширч болно. Энэ нь хэвийн буюу физиологийн үйл явц юм.

Зүрхний хэм алдагдалтыг зүрхний цохилтын хурдаар нь 2 ангилдаг.

Тахикарди – Зүрхний цохилт түргэсэх / тайван үед 1 минутад 100 аас их байх/

Брадикарди – Зүрхний цохилт удаашрах / Тайван үед  минутад 60 буюу түүнээс доош байх/

 Шалтгаан

Хэм алдагдлын хамгийн том шалтгаан болж байдаг зүрхний өвчин нь зүрхний титэм судасны эмгэг байдаг. Арай цөөн тохиолддог шалтгаанууд нь зүрхний хавхлагын гажгууд болон зүрхний булчингийн үрэвслийг хамардаг. Бамбай булчирхайн дааврын тэнцвэргүй байдал эсвэл цусан дахь калийн хэмжээ хэт ихсэх гэх мэт цусны химийн найрлагын тэнцвэргүй байдал үүсэх нь хэм алдагдлын шалтгаан болж болдог. Зарим эм, бронх тэлэгч эмүүд болон дижитал эмүүд гэх мэт эмүүд нь хэм алдагдлын шалтгаан болж болно. Үүний адилаар кофеин, тамхи зэрэг нь хэм алдагдлын шалтгаан болдог ч зарим тохиолдолд шалтгаан тодорхойгүй ч байж болдог.

Шинж тэмдэг

Шинж тэмдэг байнга илрээд байдаггүй бөгөөд илэрсэн тохиолдолд цочмог байдаг. Дараах шинж тэмдгүүдийг хамардаг. Үүнд:

• Зүрх дэлсэх
• Цээж өвдөх
• Амьсгал давчдах
• Зүрхний цохилт түргэсэх
• Зүрхний цохилт удаашрах

Хүндрэлүүд нь тархинд цус харвалт, зүрхний хурц дутагдал болон зүрхний архаг дутагдлыг хамардаг.

Авч болох арга хэмжээ

Хэрэв танд зүрх хэт хурдан юм уу удаан цохилт байгаа юм шиг санагдаж байвал та зүрхний нарийн мэргэжлийн эмчид үзүүлж зөвлөгөө авч онош тодруулах хэрэгтэй.

Харин дээрх шинж тэмдэг дээр амьсгал давчдах, сулрах, толгой эргэх, ухаан алдах, цээжээр хүчтэй хатгуулах зэрэг таагүй мэдрэмж төрж байвал яаралтай 103 дуудаж эмнэлгийн тусламж аваарай.

Оношилгоо

Зүрхний хэм алдагдалтыг оношлохын тулд эмч ерөнхий биеийн үзлэг, оношилгооноос гадна өвчний түүх шинж тэмдгийн талаарх асуумжаар хэм алдалт үүсгэж болзошгүй нөхцөл байдал урьтал өвчнийг шинжилнэ. Оношилгооны хувьд ихэвчлэн дараах төрлийн шинжилгээнүүдийг хийнэ.

• Зүрхний цахилгаан бичлэг
• Холтер бичлэг (зүрхний)
• Эхо (зүрхний)
• Зүрхний ачаалалтай сорил

Эмчилгээ

Зүрхний хэм алдалтын эмчилгээ нь тахикарди эсвэл брадикарди байгаа эсэхээс хамаарна. Ихэвчлэн эмийн эмчилгээ хийх ба шаардлагатай тохиолдолд цахилгаан имьпульс эмчилгээ , мэс засал пайсмакер тавих зэрэг эмчилгээ хийнэ. Хэм алдалдалтын эмчилгээний зорилго нь

• Цусны бүлэгнэлтийг тогтвортой хэмжээнд барьж шигдээсээс сэргийлэх
• Зүрхний хэмийг хэвийн хэмжээнд барих
• Хэм алдалтад хүргэж буй шалтгааныг олж, эмчлэх