Хөх томруулах суулгацын талаар таны мэдэх ёстой зүйлс

Өнөө цагт өөрийн биеийн болон нүүрний асуудалтай хэсгүүдээ пластик мэс заслын аргаар өөрчлөх боломжтой болсон. Хамгийн түгээмэл хийгддэг мэс ажилбаруудын нэг бол хөхний өө засах, томруулах юм. Энэ удаад бид хөх томруулах мэс ажилбарын талаарх мэдээллийг нэгтгэн танд хүргэж байна.

Суулгацын төрөл

Хөх томруулах суулгацын чанар, эдэлгээ, солих хугацаа зэрэг нь агуулагдах дүүргэгчээс хамаарна. Одоогийн байдлаар дараах 3 төрлийн дүүргэгч ашиглагддаг:

Давсны уусмал

Пластик мэс заслын хамгийн анхны ашиглагддаг байсан суулгацын нэг боловч одоо ашиглагдах нь ховор болсон. Бусад суулгацтай харьцуулахад үнийн хувьд хямд, жижиг зүсэлт хийгддэг, хүний биед хоргүй давсны уусмалаар дүүргэсэн тул гэмтэж хагарсан тохиолдолд ямар нэгэн сөрөг үр дагаваргүй зэрэг давуу талуудтай хэдий ч мэдэгдэхүйц жинтэй учир хөхний булчирхайг унжуулах, хөдөлгөөн хийхэд чимээ гарах, амархан гэмтэх, тогтмол солиулах шаардлагатай зэрэг сул талуудтай байдаг байна.

Силикон

Одоо ашиглагддаг силикон суулгацын гадаргуу илүү чанартай болж гэмтсэн тохиолдолд тархдаггүй өтгөн гелиэр дүүргэгдсэн байдаг. Хүрэх үед төрөлхийн мэт мэдрэмж төрүүлэх, харшлын урвал үзүүлэх магадлал бага, санах эсийн тусламжтайгаар базсан үед ч буцаад хэвийн хэлбэртээ орц чаддаг зэрэг давуу талуудтай.

Гидрогель

Энэхүү суулгацын нь байгалийн гаралтай карбоксиметил целлюлозоос бүтдэгээрээ онцлогтой юм. Үнийн хувьд бусад суулгацаас нэлээд зөрүүтэй ч хэд хэдэн давуу талууд бий. Харшлын урвал, үрэвсэл үүсгэх магадлал бага, суулгац задарсан ч биед аюулгүй глюкоз, ус, нүүрстөрөгчийн давхар исэл зэргээс бүрдэнэ.

Суулгацын ашиглалтын хугацаа ба анхаарах зүйлс 

Ихэнх эмэгтэйчүүдийн хувьд хөх томруулах мэс ажилбар хийлгэснээр насан туршдаа асуудлаа шийдсэн гэх нийтлэг ташуу ойлголттой байдаг. 1960-аад оноос хойш хөхний суулгац харьцангуй сайжирч аюулгүй болсон. Хэдий үйлдвэрлэгчид хөхний суулгацад насан туршийн баталгаа өгдөг ч ашиглалтын хугацаанд нөлөөлөх олон хүчин зүйлс бий.

Суулгацын ашиглалтын хугацааг дунджаар 10-15 жил гэж үздэг. Тогтсон нэг хугацааг хамгийн туршлагатай мэс заслын эмч ч хэлэхэд хүндрэлтэй байдаг байна. Учир нь тухайн эмэгтэйн биеийн ерөнхий эрүүл мэнд, суулгац байрлуулсан хэсгийн өөрчлөлт, арьс унжих зэрэг олон хүчин зүйлс үүнд нөлөөлнө. Иймд, мэс ажилбарын дараа суулгацын байдлыг тогтмол шалгуулах шаардлагатай гэдгийг анхаарна уу!

Суулгацын хэмжээний тухайд

Суулгацын хэмжээ нь дүүргэгчийн эзлэхүүнээр тодорхойлогдоно. Загвар болон үйлдвэрлэгчээс хамааран тус тусын “хэмжээний хүснэгтүүд” бий. Дунджаар 150 мл дүүргэгч тутамд хөх нэг хэмжээгээр нэмэгддэг. Хэмжээг сонгоход цээжний өргөн, хөхний анхны хэмжээ ба түүний хэлбэр, арьсны уян хатан байдал, цээжний бүтцийн онцлог шинж чанарууд зэргийг харгалзаж сонгох хэрэгтэй юм.

Мэс ажилбарын тухайд

Хөх томруулах мэс ажилбарыг нийт 3 төрлийн аргачлалаар гүйцэтгэнэ. Эхний аргачлал нь суганы төрөлхийн үрчлээнд 2-3 см зүсэлт хийж хөхний доор байрлах цээжний булчингийн доогуур суулгацыг оруулах юм. Энэ төрлийн мэс ажилбар нь хөхний тэгш байдлыг хадгалах, мэдрэл гэмтээх эрсдэл бага зэрэг давуу талуудтай байна. Хоёр дахь аргачлал нь хөхний товчны хүрээний орчимд бага зэргийн зүсэлт хийж суулгацыг байрлуулах юм.  Ихэвчлэн хурдан эдгэрэх хүсэлтэй, өвдөлтөд тэсвэргүй эмэгтэйчүүдэд тохиромжтой бөгөөд сорив бага үлдэх, дахин мэс засал хийх тохиолдолд тохиромжтой зэрэг давуу талуудтай байна. Гурав дахь аргачлалын хувьд хөхний доод болон хэвлийн хөндийн дээд хэсгийн дундах үрчлээнд 3-4 см зүсэлт хийж суулгацыг байрлуулах юм. Энэ мэс ажилбар нь бага хугацаанд хийгдэж, хөхийг төрөлхийн мэт харагдуулах давуу талуудтай байна.

Та эрүүл мэндийн сонирхолтой мэдээллийг манай цахим хаягуудаас хүлээн авах боломжтой: 

Facebook , Instagram , Youtube